預產期挨近新年本身都好驚，因為踏正新年紅日生好似會加錢，我啲PK朋友成日恐嚇我會上電視生豬年第一個BB，好在呀仔乖，初五出世，立春之後做到豬年BB，又可以等老爺奶奶開開心心係鄉下過埋個年，兒子生性病母感安慰。
上篇講完執走佬袋，今篇入戲肉分享生仔過程點點滴滴啦，自己留個紀念又希望幫到大家有個心理準備，定啲定啲～
生仔三步曲：見紅‧陣痛‧穿水
阿仔係38週5出世，重量7磅7，算中大碼B，當時醫生見到我個肚都叫我陣間要大力 push佢出黎，我嘅身形比例同個肚真係爭太遠，而家睇番大肚相都驚嘆人體奧妙，個肚竟然可以拉到咁大！！？？講番先，我整個孕期重咗26磅，食得唔多因為個肚陀好高頂住個胃，我又無食花膠谷大佢，但佢都成7磅7，只可以話佢好吸收⋯⋯
話說最好3個朋友都係順產，所以都俾好大信心我順產，其中一個係用無痛分娩，聽到有幾爽之後我都決定要打，同埋重點係我M痛咗大半世人，我唔想經歷比M痛痛十級的生仔痛，嗚～～～～另外，關於生仔三步曲嘅見紅、陣痛、穿水，佢地都有溫馨提示我，叫我就算見紅都有，都一定要「規律陣痛」先好入院，即係規律都8分鐘痛一次而持續得耐既就起行啦，見紅都未入得喎（當然穿水就立即入院啦！！），因為尤其第一胎開度數真係有排等，宮縮得唔夠勁公立會打你回頭，我諗諗下私家入咗去比人彈鐘咪又要extra比錢！？加上第一胎唔知宮頸開成點，隨時玩我3日咪大鑊？（我真係有朋友痛咗3日先生得）所以我秉承住呢個宗旨，點都等到規律宮縮6至8分鐘先入去。
仔仔2月9日出世，其實我2月8日下午個肚已經囉囉攣，有M痛感，好記得小便痾咗舊啫喱狀既黃黃綠綠分泌物出來，中醫話呢舊叫「子宮頸栓塞黏液」，佢嘅作用媽媽懷孕時塞住子宮頸，你當好似紅酒塞咁啦，避免外面的病毒細菌感染到BB，如果子宮開始收縮，子宮頸頭嘅黏液栓塞就會排出來，你就知道時辰到啦BB要出來了！痾咗呢舊嘢出來之後都無咩大感覺，好間唔中先有M痛感，但成晚都訓唔好，到第二朝就起身沖定涼洗定頭，但宮縮都係好耐先一次，到夜晚宮縮開始密＆持續時間長D，我叫老公快D砌定BB床（因為聽老人家講一早砌定BB會早出來），我就再沖多次涼先，到凌晨12點幾，宮縮已經6至8分鐘一次，立即出門飛的去養和！
養和產房入院流程
生之前好擔心薄扶林去跑馬地會塞車，香港仔隧道真係成日塞，好在阿仔生性，凌晨去就必定唔塞啦！凌晨12點到養和就㩒鐘仔叫姑娘開門，當時得3個姑娘，好黑好靜，姑娘同我做檢查check宮縮、心跳、BB心跳，check度數，仲話如果未生得打回頭要比「開機費」約＄1000（所以點解真係要規律宮縮先好去，咁就＄1000架啦！），之後姑娘同我內診check開度數，好驚訝同我講：「你第一胎呀？子宮頸好薄啦，薄過張紙啦隨時穿水，好叻呀你！」
之後立即同我登記入院安排床位，簽好幾件文件之後，就安排我上病房，由於我住大房，老公無得留低陪我（半私家病房先可留低，好似要另比加床費），佢就返屋企先，入產房先叫佢返來，同佢say goodbye後我就換衫同收拾用品 大概一小時後，訓訓下忽然聽到陰道有一下爆氣球嘅「噗」一聲，真係好清脆嘅爆波聲，之後D水就黃河泛濫一發不可收拾咁流，立即打比姑娘叫清潔姨姨來換床單，真係好濕，我自己都十分唔好意思。。。姑娘再幫我check度數，佢話都2度幾啦，問我會唔會想落產房安排打無痛先，因為麻醉科醫生45分鐘到達，無慮即say yes!!!! 打完無痛之後我就解脫，安心瞓覺等生啦～～yohoooooooo!
老母救星「無痛分娩」－過山車驚心動魄式生仔
姑娘推我落產房之後就幫我種豆，set胎心機同宮縮機mon住我同BB情況，可能因為凌晨，都係得一位姑娘照顧我。無幾耐，我期待已久嘅麻醉科醫生到啦！好順利咁幫我拮針打無痛，全程我只需盡力將自已捲到一粒蝦米咁，上網聽人講話枝針好粗好痛，我就真係無咩感覺，好快搞掂，仲feel到一股涼浸浸嘅液體流過下背，之後feel唔到宮縮痛了。
打完無痛好似係。。。凌晨3點幾咁，正當我以為可以抖下啦，阿仔成日係我肚郁來郁去，搞到check唔到心跳，姑娘要我轉來轉去搵返佢個心跳出嚟。無幾耐忽然見到阿仔心跳drop，無啦啦由130幾drop到80幾，然後忽然搵唔到，姑娘好驚，係我個肚面左探右探，然後一秒撲去打電話哪另一位姑娘來幫手，再塞隻手指入我下體抽插一陣（打咗無痛所以無覺得痛），總之就好似急救咁，然後同我講有機會緊急開刀，立即打俾醫生，我都未有時間驚，只答佢一句「好，BB安全就得。」，之後無啦啦阿仔個心跳又出現返，大家都鬆咗一口氣，然後姑娘話俾D補品我聞下，就駁咗條氧氣俾我。之前發生一系列嘅事真係電光火石之間，阿仔無事我先識得驚，心諗「第一胎已經無咗，好不容易有第二胎，陀到38週幾要生了，呢個時候先忽然無心跳？上帝你玩我嗎？」仲以為打完無痛有得抖，忽然搞單咁嘅嘢，我成晚就望住個心跳機，一路用念力希望阿仔心跳keep住130幾，有時無啦啦落返110幾我又會驚一下，又用念力推返佢上去，總之，就係成晚無瞓過，我老公都無得瞓，因為部心跳機唔係正對住我，我成日問老公阿仔心跳幾多？成晚講得最多就係問佢「而家心跳係幾多？」XDDDD （而家就笑得出）
正因為發生過忽然無心跳事件，姑娘提議我地call兒科醫生standby，就係咁原本7萬幾既生仔費on top加咗皮幾，埋單9萬1
我問姑娘阿仔心跳無啦啦做咩會drop？姑娘話有機會我打無痛之後身體需要適應，BB都要適應，所以有咁嘅情況，實屬少見。不過生埋細佬之後（同樣有打無痛），我同老公賽後檢討一致認為真係大仔郁來郁去check唔到，姑娘又搵唔到一時驚慌搞咗場大龍鳳（重點係搞到佢俾多咗皮幾嘢，哈哈！）不過順利就得啦健康就好！
PUSH～PUSH～PUSH～
個個都話順產好似痾大咁，總之就好似痾大咁屙佢出嚟！！
打完無痛3點幾，到早上8點幾開到8至9度，中途好幾個姑娘幫我check下度數，有啲覺得個身體唔係自已。之後姑娘叫我試下用力痾，因為阿仔個頭比較大，其實個位未正，當我痾嘅時候佢同時插隻手指（我希望只係手指）入去托返啱阿仔個頭。由我開始痾到真正生出來差不多用咗一粒鐘，我真係估唔到我用咗咁耐時間，明明入院姑娘仲讚我第一胎開咗一度子宮頸好薄啦咁⋯⋯
係生仔呢一個鐘頭係我人生體力消磨得最勁，感覺以前打排球練波都無咁攰。首先生仔嘅姿勢係類似sit up但擘大雙腿，仲要擘得幾大下，身旁有手柄俾你揸住借力，每一下push你要出盡力痾，姑娘幫你數10秒或更多，盡力last得愈耐愈好，之後姑娘叫你換氣，但又不能好大力換，因為太大動作阿仔會縮返入去就前功盡廢（好似痾屎咁），三次push為一組。我打咗無痛係唔痛，但真係好攰，push到出晒汗，口好乾好乾好乾好乾好乾，要不停飲水，push到一個位我好絕望，然後內心極度後悔揀順產，一邊push一邊怪自己「要咩自然咩身體復原快，搞到而家幾攰自己又辛苦！！！」有一刻好想叫姑娘吸佢出嚟算啦！（與此同時力力狂幫我抹汗～）
喺我絕望地痾嘅時候，幾個姑娘忽然埋位一齊出力雙手壓落我個肚，醫生又好大聲鼓勵我，「大力啲！係啦！係啦！」好似進入直路啦喎！？然後我又好用力痾，再次電光火石之間阿仔就出咗嚟，之後兒科醫生幫佢清潔等等等⋯⋯我就⋯⋯筋疲力竭攤喺床，醫生幫我聯針，之後推返上房休息，最搞笑嘅係我個盤胎用膠袋袋住放係我架車，上到房問我要唔要，不過原來胎盤係好大抽 XDDDD
無痛分娩排解疑難
關於打無痛大家都有好多疑問，不如由非專業人士嘅過來人講解下～
Q：打無痛係咪真係唔痛？完全無知覺？
A：NO！只係肚同腰無痛感，麻醉科醫生會將麻醉藥調得恰到好處，即係我係feel到你掂我只係我唔痛，好amazing的！大脾同小腿有少少痺，我都好驚下半身無知覺，所以我不時郁下隻腳收下腳趾咁，係有知覺既！ 我記得當時每兩小時姑娘會幫我加一次藥，加到真係開晒度數佢就無加藥，等我更強烈feel到宮縮，就識用力push阿仔出來。
Q：超！最後生個時都停藥架啦！打來有咩用？
A：生仔最痛苦就係宮縮開度數呀！！當BB進入咗產道你既痛已經舒緩咗D，同埋停藥，係你身體入面嘅藥仲有架啦，個人經驗個痛唔會一下子由零到100，我印象中都係唔痛，最後push佢出嚟嘅感覺係有一舊萬年大便塞住咗你要用力痾啦！！！
Q：聽人講打無痛會腰骨痛？
A：講返無痛分娩正式學名叫「脊髓硬膜外麻醉」，根據醫生分享同我上網睇過嘅報導呀訪問呀咁，無痛分娩同腰骨痛係無直接關係。因為無痛分娩係從產婦的脊椎末端在硬脊膜外注入麻醉劑，沒有拮到入含有神經的脊髓腔，因此唔會造成腰痛問題。個人經驗腰背痛反而係我個仔成日媽咪抱媽咪抱，細個D都算，而家成30磅，唔抱佢又可憐，但其實我又唔夠力，為母則強頂硬上，姿態唔正確導致，加上同佢一張床成日無影腳踢我，唔痛都幾難。
Q：打無痛幾錢？
A：養和為例，我2019年生個時，無痛枝針係$7000，麻醉科醫生好似都係$7000咁上下，你預$15000。
Q：公立係咪都有得打無痛？
A：有嘅，聽朋友＆上網睇媽媽分享經驗得出想結果係要「睇彩數」。產檢我係私家同公立兩邊睇，都有問過醫生呢條問題，佢答「有」，仲係一星期7日24小時都可以（理論上ß我自己加）。但大家都知公立醫院醫護workload好重，如果你生個時咁岩麻醉科醫生唔得閒就無得打；另外，打無痛最佳時間係開到3度，如果過咗姑娘唔會俾你打。又另外，聽返來姑娘好似普遍都唔鼓勵你打，會叫你用其他方法止痛，除非你要生要死不停強調我要打我要打。
如果我老公係公立做醫生嘅我都一定係公立生！實搭通天地線。
Q：點解我會打？
A：我M痛咗大半世人，我唔想經歷比M痛痛十級的生仔痛。同埋身邊太多朋友痛到標汗用個頭冚牆生不如死／唔識用力／開唔到度數／虛耗得太勁最後痾個仔出嚟痾到發燒，個仔又發燒，要打幾日抗生素／食全餐最後開刀。另外，公立生有太多未知數，唔知邊位醫生接生／怕實習醫生／無得打無痛⋯⋯我想係一個我已知嘅狀態下生仔（如果afford到的話），當然都有無數咁多人係公立生產都十分之順利，母子母女平安肥肥白白健健康康，而且公立醫院嘅醫療設備比私家好，個B早產或出世有咩事，最終都係轉去公立治療，我沒有要比較「公立醫生」同「私家醫生」，只係on打無痛分娩呢一part分享個人睇法，戴返頭盔先！
其實第二胎想慳錢本來去公立生搏下打無痛，點知第三波疲情又來，最後轉返去私家，不過今次去浸會！
下次又講下疫情下喺浸會生仔經歷！BYE～～～～～
養生IsTheNewBlack 