月經驚魂錄｜月經病(二)月經後期

上回分享「月經先期」出現嘅原因同湯譜，今次不如講下月經後期啦！

遲嚟M我估大部份女性都試過，相比早嚟M，其實遲嚟更驚心動魄，怕有咗嘛（做足安全措施就係咁話啦）！但慘就慘在你越驚越擔心身體就會有壓力，M神就遲上加遲，所以遲遲下我都習慣兼放鬆了心情，M神你開心就得，鍾意來就來吧！不過不過，話就話放鬆心情啫，慣性遲嚟M都真係要正視嘅，小女子就因為有多囊卵巢症，所以M神就好似夢遺大師咁隨風而來隨風而去，係難搞少少，年少無知個時仲驚佢唔嚟狂隊涼茶有次仲飲埋崩大碗，點知寒底飲完寒上加寒個肚痛到係街差D暈低。如果你地有乖乖每年做下婦科檢查，知道「副計」無問題的話，恭喜恭喜，只要留意自己身體同參透以下解說，俾少少耐性調理下，M神就會同你做番好朋友，月來月順，每月準時探你啦喂！

何謂月經後期？

答long Q係要先寫下definition先！月經後期簡單來說就是遲嚟M，仲要係延後起碼7日以上，起碼兩個週期先算呀！如果偶爾一，兩次，遲幾日的話就算吧，可能係壓力影響啫！唔怕！

導致月經後期出現，主要因為血寒、血虛、虛寒、氣滯四個病因，乜東東嚟架？好！去片！！

（一）月經後期：血寒

好凍好凍好凍，凍到D血都凝固，又怎能化為月經流出體外？「血寒」引致月經後期的原理大概是這樣，但，點解無啦啦會血寒呢？原因有三：經行產後，大家有無聽過「產前一團火，產後一塊冰」？在中醫來說，寶寶是「純陽之體」，所以孕婦陀BB時體溫特別高，但本身女性屬陰，加上分娩過程對身體產生一定的耗損，產後氣血不足，身體虛弱，若調理不當就容易怕冷。其次就是外感寒邪，最後就是日常吃過多寒涼食物，身體受寒氣或寒邪干優，血為寒凝，在體內流動受阻，沖任運行不暢，血海不能如期滿溢，引致月經後期。血寒型女性首先月經會延後，月經量少兼色暗有血塊，小腹（肚臍下方位置）冷痛，熱敷時痛楚得以舒緩，十分怕凍同時手腳冰冷，脷苔白。

血寒食療

血寒女性需要溫經散寒調經，中醫一般會處方「溫經湯」，日常食療大家可煲羊肉湯，有「溫經健脾，驅寒調經」之效。羊肉在中醫學來說有溫補強壯功效，可補腎陽、益精血、袪寒，能補血溫經。

溫經羊肉湯（二人份量）

材料：
淮山 15克
羊肉 300克
杞子 12克
薑 3片

做法：
1. 羊肉汆水
2. 淮山、杞子沖洗再浸10分鐘
3. 13碗水，水滾後將所有材料放入，大火滾10分鐘，轉細火煲2小時］加鹽調味即成。

除以上湯水，平日早上可多喝「紅糖紅棗生姜飲」（忌晚上飲），平日亦可多吃雞肉、豬潤、羊肉、海參、南瓜、紅棗、姜等食物改善。

（二）月經後期：虛寒

經常聽身邊女性朋友話手腳冰冷，包括未生呀仔之前既我都係，老公最怕冬天既我，因為我必定會將我隻凍腳凍佢個肚，當時為咗有覺好訓，我會臨訓先沖涼，對腳暖笠笠咁入睡，如果一放工就立即沖涼，訓個時隻腳就會凍冰冰點用被包佢都唔暖，好辛苦（哭）。經想聽人講「十個女人九個虛」，陰虛陽虛氣虛血虛，今次就講下令到M神遲遲未駕到的「虛寒」！

引致女性虛寒主要原因有二：本身體虛，或久病傷陽，身體唔夠陽氣，個人就會冷冰冰，臟腑失於溫養，影響血液運行，再影響血海不能如期滿溢，引致月經後期。「虛寒」型女性除了女經延後，量少，血色淡且稀，無血塊，小腹隱痛，腰酸無力，喜熱喜按，小便清長而大便不成形，舌淡苔白。

虛寒食療

對於虛寒女性，治法就是「扶陽袪寒調經」。分享一下我最愛我胡椒豬肚雞湯，和胃驅寒又溫宮，更可做打邊爐湯底！！

1. 杏汁胡椒豬肚雞湯（二人份量）

材料：
老雞 1隻
豬肚 1個
白胡椒 40克
南北杏 160克
杞子 12克
紅棗 6粒

做法：
1. 南北杏沖洗後浸過夜，第二日把水倒去，將南北杏加100ML水放入攪拌機打，用魚湯袋隔渣，留100ML杏汁。
2. 豬肚和老雞清洗後汆水
3. 紅棗沖洗，剪開去核；杞子沖洗，與紅棗一同浸十分鐘。
3. 白胡椒沖一沖後搗碎，放小魚湯袋。
4. 13碗水，水滾後倒入杏汁，將所有材料放入，大火煲十分鐘，轉細火煲2小時，加鹽調味即可。

2. 暖身麻油雞湯
＊早前好友T在家整麻油雞補身，立即口水分泌，天呀太想念台北麻油雞和腰花湯！順道在此跟大家分享食譜，加個麵線落去都仲得呀喂！

材料：
雞脾肉(我用S-pure) 一盒兩塊
黑芝麻酒 200ML
薑片10片
台灣紅標米酒（購自city super）500ML
杞子 15克
蔥 適量
鹽 適量

做法：
1. 雞脾肉沖洗用廚房紙吸乾水
2. 黑芝麻油凍油落鑊再放入薑片，中小火慢慢把薑煮成金黃，再放入雞肉至表面金黃
3. 放入米酒、蔥和杞子，煮約半小時，加鹽調味即可。

（三）月經後期：血虛

血虛女性會月經延後，量少，色淡水，無血塊，頭暈，心悸，面色蒼白，舌淡紅。本人個人都唔夠血用，又點會多餘血出呢？月經延後原因有四：久病體虛；產婦產乳過多；長期慢性失血，還有飲食疲勞，傷脾胃，未能化成氣血滋養身體，以上原因均會令沖任血虛，經水延後。

血虛食療

唔夠血搞到M神遲嚟咁點呀？就是要「補血調經」呀！上一篇關於月經先期中提過氣與血的關係：「氣為血之帥」，血既流動要靠氣推動，兩者缺一不可，有血無氣，有氣無血都唔得；因此補血的同時要補氣，最常見的用料就是北芪和黨蔘！各位大大可參考以下湯譜：

1. 北芪黨蔘竹絲雞湯

材料：
竹絲雞 一隻
豬𦟌 60蚊（購自百佳）
北芪 30克
黨蔘 30克
圓肉 20克
杞子 15克
南棗 10粒
薑 2片

做法：
1. 竹絲雞斬開數件，與豬𦟌一同汆水。
2.北芪、黨蔘、圓肉、杞子、南棗先沖10分鐘。
3. 13碗水，水滾後將所有材料放，大火滾10分鐘，轉細火煲2小時，最後加鹽調味。

＊竹絲雞即烏雞，比一般雞無咁燥，而且更滋陰養血，通常煲補血湯類我都會用竹絲雞！

2. 三棗茶飲 （一人份量）
＊三棗茶即紅棗、南棗、蜜棗，太忙無時間煲湯，焗下三棗茶飲都係不錯既選擇。

材料：
紅棗 6粒
南棗 2粒
蜜棗 1粒

做法：
1. 將紅棗、南棗、蜜棗先沖洗，再去核切絲。
2. 3碗水煮半小時 或用保溫瓶焗半小時即可。

（四）月經後期：氣滯

點解身體會出現問題？根據宋代陳無澤的《三因說》中指出：外因（風、寒、暑、濕、燥、火）、內因（喜、怒、憂、思、悲、恐、驚）、不內外因（飲食失節、疲勞過度、蟲獸所傷、跌仆所傷），均引致我們生病。對女性來說，情志十分影響我們健康，唔知大家有無發覺，當你壓力大，或同另一半嗌交唔開心，嗰嗰月既月經通常都嚟得唔好，血色唔靚，唔暢順，甚至會延後，受情緒影響，「氣滯肝鬱」情況常見於女性身上，試想像條氣chok住chok住，氣唔順，血液不能暢順流動，再影響血海，就引致月經後期啦！

氣行得唔好，連帶血既流動都有影響，血係身體入面大塞車，所以「氣滯」通常伴隨「血瘀」出現。月經延後不突止，量少、更會色黯紅或有血塊、小腹脹痛、或兩脅、乳房脹痛。

氣滯食療

條氣唔順，就要理氣，等條氣順番，D血都行番好，問題就解決了！不過對於多受情志影響造成氣滯人士，日常生活上還是放鬆一點，多做瑜珈或打坐，調整心情。

1. 浮小麥炙金草湯（二人份量）

材料：
浮小麥 30克
炙金草 12克
南棗 10粒
瘦肉 60蚊
陳皮 一瓣

做法：
1. 瘦肉汆水
2. 浮小麥、炙金草、南棗、陳皮先沖洗再浸10分鐘。
3. 10碗水，水滾後放入材料，大火滾10分鐘，轉細火煲2小時，加鹽調味即可。

2. 紅糖山楂飲

材料：
山楂乾 30克
紅糖 適量

做法：
1. 山楂乾沖洗再浸10分鐘
2. 3碗水，水滾後加入山楂和紅糖煮15分鐘，熄火後再焗10分鐘。

• 

3. 白背木耳紅糖水
＊當月經來得唔暢順或有血塊，M後我會連續3日每日一碗白背木耳紅糖水，之後會有少少瘀血排出，排淨瘀血就重新造人，隔天飲番炒米茶醒醒神，再視乎身體情況按需要煲唔同湯水。

材料：
白背木耳 2朵
紅糖 適量

做法：
1. 白背木耳沖洗後潑15分鐘至軟身，切絲備用。
2. 3碗水，水滾後轉中小火煮白背木耳和紅糖15分鐘即可。