朋友A：「唔知點解我呢幾個月都早咗成個星期嚟M⋯⋯」
朋友B：「死啦，我D M越來越遲，遲咗十幾日都未嚟又唔係有咗，D血仲越來越少，我係咪老啦？」
容許我從女性角度再一次讚女人真係好叻，因為女性除了要工作要養家，我哋還要窮一生將自己身型變好樣變靚，外在美又要有內在美，內涵修養就固然，我意思係「副計」呀！每天承受工作壓力，就連早咗嚟M同遲咗嚟M都要擔心一餐，真係要擔心架唔好講笑，慣性的早和遲M真係代表身體出了問題，屬於「月經病」一種，絕對要正視。今次就從中醫角度講下早M（月經先期）形成既原因同share下食療，希望比D ideas大家，齊齊「月來月順」XD
什麼是月經病？
月經病係指月經的週期、經期、經量、經色、經質出現異常，或者伴隨月經週期出現的症狀，例如：月經先期（早咗嚟M）、月經後期（遲咗嚟M）、月經先後無定期（早下又遲下）、月經過多、月經過少、月經延長、閉經（無M嚟）、經間期出血（排卵期出血）、崩漏（如黃河泛濫一發不可收拾咁出血）、痛經，還有一系列月經前後出現的頭痛、眩暈、浮腫、出疹、乳房腫痛、頭痛⋯⋯以上全部都係月經病。
咁有月經病又點算？就是要好好調經呀！其實中醫對於治療月經病有四大法則：
1. 調理氣血
2. 補腎
3. 扶脾
4. 疏肝
什麼是月經先期？
嚟早咗喎你M神！
月經先期是指月經週期「慣性」提前7天或以上，即是週期28日的話，你連續好幾個月都係週期23日就來經。但要留意！！！係要「慣性」提前7日或以上先屬於月經先期，如果只係偶爾一兩個月早咗就算了，因為M神份人好小氣，好易受飲食、心情或壓力影響，我就試過因為感冒食過幾日抗生素，下一個月既經期就遲咗個幾星期，所以偶爾遲／早都不同太擔心。
月經先期原因主要是「氣虛」和「血熱」引起。
月經先期：氣虛
個個都氣虛唔通個個都想氣虛咩？究竟咩係氣虛？講氣虛之前了解下咩係「氣」先！
中醫認為「氣」、「血」、「津液」係構成人體和生命活動最基本和最重要的物質。「氣」是宇宙本源，天地間一切事物皆為「氣」的運動和變化之結果，它是流動性，能流遍全身。
「氣」主要來自三方面：
1. 父母遺傳
2. 水谷之精 － 透過身體脾胃消化食物後，從食物中吸收的營養中而來
3. 大自然 － 我們的一呼一吸，將大自然的氣吸進身體
氣的功能可推動人體發育；溫暖身體，促進新陳代謝；起防御作用，抵抗外邪；將身體物質互相轉化，如食物被身體分解後需透過氣化作用轉成水穀精微，再化成氣和血；固攝作用，穩固血液在血脈內流動、控制津液分泌和排泄，防止臟腑下移⋯⋯所以成日話補血同時要補氣，因為「氣為血次帥」，血既流動要靠氣推動，當時兩者便一不可，有血無氣，有氣無血都唔得。「氣」分為四個種類：元氣、宗氣、營氣、衞氣，今次暫不多說。
好吧，了解什麼是「氣」，入正題！「氣」咁重要，唔夠氣會點架？有無留意上面提過氣有「固攝」作用，穩固血液在血脈內流動，唔夠氣攝住D血，血就會自已流出來，所以點解M神早咗來搵你就係咁既原因。咁好人好者點解會唔夠氣先？主要因為飲食無飲制、疲勞過度、思慮過多等都會損傷脾氣，當脾氣虛，不能攝血，血就自已搵位出啦！
點知自己係咪氣虛？除了月經提前，經量會增多、色淡、經月質地較稀、成個人好攰，舌淡色。
氣虛食療
「氣虛」點算好？治法「補氣攝血」。
- 黨參北芪蓮子淮山豬𦟌湯（二人份量）
材料：
黨參 20克
北芪 15克
蓮子 10粒
杞子 15克
圓肉 10粒
乾淮山 25克
南棗 10粒
陳皮 一瓣 (一塊有3瓣，抆一瓣便可)
豬𦟌 70蚊 (唔知重量XD，次次去百佳都係揀呢個價，btw豬肉好貴)
*其實瘦肉都得，只係豬𦟌嫩D，有D筋食下，食飯沾豉油送飯very good
做法：
1. 豬𦟌汆水
2. 黨參、北芪、蓮子、杞子、圓肉、乾淮山、南棗、陳皮先沖洗再浸10分鐘
3. 黨參剪開幾節，易出味
4. 13碗水，水滾後將所有材料放入，大火煲十分鐘，轉細火煲1.5小時，最後加鹽調味，完成。
2. 五指毛桃補氣湯（二人份量）
材料：
五指毛桃 30克
紅棗 8粒(剪開去核)
有機雞腔一個 (去頭去翼去皮)
薑 一小片
瘦肉 60蚊
淮山 30克
南棗 10粒
陳皮一瓣 (一塊有3瓣，抆一瓣便可)
1. 雞腔，瘦肉汆水
2. 五指毛桃，紅棗，淮山，南棗，陳皮先沖洗再浸十分鐘
4. 13碗水，水滾後將所有材料放入，放薑一小片，大火煲十分鐘，轉細火煲1.5小時，最後加鹽調味，完成。
以上兩個湯譜可明火煲，亦可燉。湯水之外，食物如：人參、太子參、黨參、淮山、龍眼肉、陳皮、蓮子、白果、大棗、南瓜、雞肉、豬肉、牛肉、小米等都是補氣食物，可按身體情況進食。
月經先期：血熱
「血熱」另一個令月經早來的病因。「熱」分為「實熱」和「虛熱」，前者指身體受內外邪氣影響，原因有三：本身陽盛；食太多辛辣助陽食物；情志受影響，鬱怒傷肝。以上原因會令熱傷沖任二脈（沖為血海，任主胞胎，我們的月經及生育跟沖任二脈是直接相關），令血向下走，導致月經早來報到。另外，鬱怒情緒傷肝（肝鬱常見於女性身上），下擾血海，又會迫血下行。
「虛熱」則是指自身正氣虛弱不足而引致，例如病者本身屬陰虛；失血傷陰；久病傷陰，令身體水虧而火旺，熱擾沖任，讓血海不寧，迫血下行而導致月經先期。
分辦「實熱」和「虛熱」
如果你是「陽盛」致血熱，當然月經會提前，量可多可少，色深紅或紫，質地黏稠。或有心胸煩躁，面紅口乾，小便短而黃，大便乾結，舌紅苔黃。如因「肝鬱」導致血熱，月經提前，量可多可少，色紫紅並有血塊，少腹（肚臍兩側位置）漲痛，胸悶兩脅脹，乳房又會漲痛，口苦咽乾，舌紅苔黃。
虛熱呢？虛熱者會月經會提前，量可多可少，色紅而質地黏稠，或有兩顴潮紅，手足心熱，舌紅而苔少。
血熱食療
實則瀉之，虛則補之。因此，血熱者主力「清熱、涼血、袪濕」，血熱中的「虛熱」者則要同時「養陰潤燥」。
- 老黃瓜扁豆赤小豆湯（實熱者適用）－ 二人份量
材料：
老黃瓜 一個
排骨 60蚊
扁豆 30克
赤小豆 30克
陳皮 一瓣 (一塊有3瓣，抆一瓣便可)
蜜棗 2粒
＊如想加強效果可加土茯苓20克
- 排骨汆水
- 老黃瓜沖洗，留皮，刮囊去籽，一開二再切段。
- 扁豆、赤小豆、陳皮、蜜棗先沖洗再浸十分鐘。
- 13碗水，水滾後將所有材料放入，大火煲十分鐘，轉細火煲1.5小時，最後加鹽調味，完成。
2. 沙參玉竹螺頭湯（虛熱者適用）－ 二人份量
材料：
沙參 20克
玉竹 20克
麥冬 15克
生地 30克
陳皮 一瓣 (一塊有3瓣，抆一瓣便可)
螺頭 4塊
瘦肉 60蚊
- 瘦肉汆水
- 沙參、玉竹、麥冬、生地、陳皮、螺頭先沖洗再浸十分鐘。
- 13碗水，水滾後將所有材料放入，大火煲十分鐘，轉細火煲1.5小時，最後加鹽調味，完成。
養生IsTheNewBlack 